Дана Уайт: "Боксда энг қолоқ омадсиз ва аблаҳлар ишлайди"

У Халқаро бокс федерацияси (IBF) Жей Опетайяни Zuffa камарига жангда қатнашгани учун чемпионлик камаридан маҳрум қилганига эътироз билдирди. IBF қоидаларига кўра эса уларнинг чемпионлари фақат WBA, WBC ва WBO камарлари учун жангларда қатнашиши мумкин.

"Боксда муаммолар кўплиги бежиз эмас, - деди Уайт. - Бунақа қолоқ ва нопрофессионал нарсани ҳеч қачон кўрмаганман... Улар буни аниқ режалаштиришган - 110 фоизга ишончим комил... [IBF] камари ҳар доим барча матбуот анжуманларида кўринарди, чунки бу унинг камари. Шу билан бирга, улар Zuffa`нинг камари учун ҳам жанг қилишди... Нимани нотўғри қилдик? Биз уларга ҳурмат билан муносабатда бўлдик ва мен улар ҳақида бирор марта ёмон сўз айтмадим".

Уайтнинг сўзларига кўра, IBF вакили жанг ўтиши керак бўлган Лас-Вегасга келган, у ерда Опетайядан чемпионлик унвонини ҳимоя қилиш учун тўловни (тахминан 80 минг доллар) олган, сўнгра дарҳол самолётга ўтириб, учиб кетган. Ваҳоланки, у вазн ўлчаш жараёнини назорат қилиш ва жангни кузатиш учун қолиши керак эди.

"Бу одамларнинг барчаси мен дуч келган энг қолоқ омадсиз ва аблаҳлардир, - деди Zuffa Boxing раҳбари. - Келдим, чекни олдим, самолётга сакраб чиқдим-да, уйга қочдим. Мана, биз ишлашимиз керак бўлган "профессионаллар" даражаси... Улар ҳақиқатан ҳам жуда ёмон ва мен бу даражанинг қанчалик пастлигидан ҳайратда қолдим".

Эслатиб ўтамиз, Жей Опетайя кеча эрталаб Брендон Глентонни ҳакамларнинг якдил қарори билан мағлубиятга учратиб, тарихда биринчи бўлиб Zuffa чемпионлик камарини қўлга киритганди.

Опетайя сўнгги дақиқагача IBF ушбу жангни ихтиёрий унвон ҳимояси сифатида маъқуллашини кутди ва ташкилотнинг барча тартиб-қоидаларига, шу жумладан жанг куни қайта вазн ўлчашга тўлиқ риоя қилди.