Дана Уайт Жон Жонс - Стипе Миочич жанги тафсилотларини очиқлади

Дана Уайтнинг хабар беришича, оғир вазн тоифасидаги ушбу чемпионлик жанги ёз ойларида ўтказилади. Жон Жонс - Стипе Миочич жанги ғолиби кейин дивизионнинг вақтинчалик чемпиони Том Аспиналлга қарши бирлаштирувчи чемпионлик жангида октагонга чиқади.

"Шу ёзда Жонс - Миочич жанги бўлиб ўтади. Жуда қизиқарли тўқнашув. Ким ғалаба қозонишидан қатъий назар кейинги жангини Том Аспиналлга қарши ўтказади. Шундай қилсак, менимча адолатдан бўлади. Бу йигитга имконият бериш керак. У бунга ҳақли", - дея Макс Кросбига интервью берган UFC раҳбари. 

Куни кеча оғир вазндаги амалдаги UFC чемпиони Жон Жонс Стипе Миочич ва Том Аспиналлни мағлубиятга учратганидан кейин Фрэнсис Нганнуга қарши октагонга чиқиш истагида эканини маълум қилганди.

Аслида Жонс - Миочич жанги ўтган йилнинг ноябрь ойида ўтказилиши керак эди. Аммо ўшанда у кўкрак қафас мускулларини чўзиб олган ва натижада жанг бекор бўлганди. Том Аспиналл эса UFC 295 турнирида россиялик Сергей Павловичнинг биринчи раундидаёқ нокаутга учратиб, вақтинчалик чемпионлик камарини қўлга киритган эди.