Дана Уайт: "Кевин Холланднинг кетишига ҳали эрта"

"Мен бу йигитни жуда яхши биламан, у менга ёқади. У мусобақаларимизда қатнашишга лойиқ, ўйлашимча. Кевин Холланд қилаётган иш ажойиб. Брансонга мағлуб бўлганидан сўнг у ўз кураши устида ишлаши кераклигини тушунди.

У бу борада ишлашни бошлади. Лекин Чимаев билан содир бўлган омадсизликдан сўнг у кечаси билан нима бўлганини ўйлаб чиққан. У бутун оқшом: "Жин урсин, бу қандай содир бўлди?", - деб ўйлаган. У ҳиссиётга бой йигит. Ўйлашимча, айнан ҳис-туйғклар ундан устун келди. Шунчаки, унга залга қайтиши учун бироз вақт беринг. Мен бу йигитни биламан, у жанг қила олади. Унинг нафақага чиқишига ҳали эрта", - дея Уайтнинг сўзларини келтиради MMA Junkie нашри.

Кевин Холланд 12 сентябрь куни Хамзат Чимаев билан жанг қилиб, илк раунддаёқ мағлуб бўлган ва кўп ўтмасдан фаолиятини якунлаганини эълон қилган эди.