Дана Уайт Конор Макгрегорнинг бейсбол майдонидаги омадсизлигига изоҳ берди

UFC президенти Дана Уайт яқинда "Chicago Cubs" ва "Minnesota Twins" бейсбол ўйинида бир неча метр масофадан биринчи тўпни ўйинга киритиб беришга уринган Конор Макгрегорнинг омадсизлиги ҳақида гапирди. 

«Биласизми, мендан ҳам илк тўпни ўйинга киритиб беришимни кўп бор сўрашган. Ва мен буни ҳеч қачон қилмаганман ва қилмайман ҳам. Ҳеч қачон», - деди ташкилот раҳбари Жим Рум шоусида. «Кўплаб одамлар тўпни нишонга тўғри ташлаши мумкин деб ўйлашади, лекин бу бир қарашда кўринганидан анча қийин».

Шунингдек, Уайт ирландиялик жангчи қачон октагонга қайтиши мумкинлиги ҳақидаги саволга яна бир бор жавоб берди.

«Конор тўлиқ тикланиши керак. Унинг оёғи қанчалик тез тузалишини билмайман. Асосан, ҳаммаси унинг қанчалик кучли тепиши, энг муҳими, қанчалик тез зарба бериши мумкинлигига боғлиқ. Бу унинг қачон яна жанг қилиши мумкинлигини аниқлайди», - деди UFC президенти.