Дана Уайт Конор Макгрегорнинг октагонга қайтиш муддати ҳақида гапирди

"Биз кеча Конор билан шу мавзуда гаплашдик", - дея сўз бошлади Уайт. "У яхши спорт формасиги кириб боряпти. Жанг қилиш истагида ёнмоқда. У бунга тайёр. Фақат бунинг учун Макгрегор олти ойлик допинг текширувларидан ўтиши шарт. Акс ҳолда жанг ўтказа олмайди. Агар дангалини айтадиган бўлсам, биз уни келаси йилнинг ёз ойларида октагонда кўришимиз мумкин". 

Бундан келиб чиқади-ки, Конор Макгрегор ва Майкл Чендлер ўртасидаги жанг UFC 300 юбилей турнирида аниқ ўтказилмайди. Аввалроқ ушбу турнирнинг апрель ойида ўтказилиши ва айнан Макгрегор - Чендлер тўқнашуви оқшомнинг марказий жанги бўлиши ҳақида хабарлар тарқаганди. 

Лекин шу билан бир қаторда UFC президенти ирландияликнинг нима учун олти ойлик допинг текширувидан ўтиши шартлигини очиқламади. Ваҳоланки, Дана Уайтнинг ўзи 2024 йилда ташкилот Америка антидопинг агентлиги билан ҳамкорликни тўхтатишини айтганди. Шу допинг ташкилоти Конорнинг олти ойлик текширувдан ўтишини талаб қилмоқда.