Дана Уайт Нурмагомедов иштирокидаги даъвогарлар жангини тасдиқлади + ПОСТЕР

Уайтнинг айтишича, Кори Сэндхаген ва Умар Нурмагомедов ўртасидаги жанг ғолиби UFC чемпионлик камари учун расмий даъвогарга айланади. Ушбу жанг 3 август куни БАА пойтахти Абу-Даби шаҳрида ўтказилади ва UFC Fight Night турнирининг марказий жанги мақомида бўлади. 

Аслида бу икки аралаш яккакураш устаси UFC on ESPN 50 турнирида ўзаро тўқнаш келишлари керак эди. Лекин Умарнинг машғулотда жароҳат орттириб олиши натижасида бу жанг кечроқ муддатга кўчирилганди. Ўша турнирда Нурмагомедовнинг ўрнига октагонга кўтарилган америкалик Роб Фонт Сэндхаген томонидан мағлуб этилган эди. 

Маълумот учун, Умар Нурмагомедов сўнгги жангини UFC Fight Night 238 турнири доирасида қозоғистонлик Бекзат Алмаханга қарши ўтказиб, ҳакамларнинг якдил қарори билан ғалаба қозонган эди. Айни пайтда Кори UFC рейтингида иккинчи, Умар эса 9-ўринни эгаллаб турибди.