Даниэль Кормье Ислам Махачевнинг асосий муаммосини айтди

Кормьенинг айтишича, Ислам Дастин Порьега қарши ўтказган жанги учун танқидларга лойиқ эмас. Махачев америкалик тажрибали рақибини бешинчи раундда бўғиш усули билан мағлубиятга учратган эди. 

"Исламнинг муаммоси шундаки, у кутиш қурбонига айланди. Муддатидан олдин ғалаба қозонмаган тақдирда ҳам у раундлар бўйича 4-1 ҳисобида олдинда бораётганди. Бу каттагина устунлик. Ислам зўр жанг қилди. Махачев "стойка"да, яъни тик ҳолатда ҳам хавфли зарба эгаси эканини намойиш эта олди. Ўйлашимча, у ўз вазифасини яхши уддалади. Лекин юқорида айтганимдек, у кутиш қурбонига айланди. Ҳар ҳолда у Хабиб эмас! Хабиб барча жангларида биринчи рақам остида ҳаракат қилган. Октагонда жанг унинг назорати остида кечарди. Ҳеч қачон уни қийин ҳолатда кўрмаганман. Шунинг учун, Исламда Хабибнинг натижаси ва жангларини кутиш ноўрин", - дея Xtra MMA каналига интервью берган Кормье.

Эслатиб ўтамиз, Ислам Махачев навбатдаги жангини 26 октябрь куни Абу-Дабида ташкил этиладиган UFC 308 турнири доирасида ўтказиши керак. Катта эҳтимол билан унинг рақиби рейтингда биринчи ўринни эгаллаб турган Арман Царукян бўлади.