Даниэль Кормье: Мен Миочич билан курашмайман, жанг қиламан

Кормье эртанги жанг олдидан ташкил этилган матбуот анжуманида трилогияга кўрган тайёргарлиги ва рақиби ҳақида берилган саволларга жавоб қайтарди. 

"Олдимда энг оддий йўл турибди — бу рақибни тейкдаун ҳолатига тушириб, партерда ушлаб туриш, — дея сўз бошлади Кормье. — Биринчи бор уни тейкдаунга туширганимда оз эмас, кўп эмас, уч дақиқа давомида партерда ушлаб тургандим. Бунинг учун катта куч керак. Бу сафар курашишни истамайман, аксинча жанг қилмоқчиман. Унинг юзига уришдан роҳатланаман. Шунинг учун эртанги жангда унга зарбалар йўллайман".

"Кўпчилик Олимпиада даражасидаги курашчи эканимни ва рақибни кўтариб ерга уришим кераклигини айтмоқда. Лекин Миочич ҳам курашни яхшигина ўзлаштириб олган. Буни ўша биринчи жангимизда оёғидан ушлаб олган пайтимдаёқ сезганман. Унда тейкдаундан ҳимоя имунитети шаклланган. Уни шунчаки кўтариб ташлаш осон иш эмас. Тўғри, мен партерда исталган рақибдан устунман. Аммо, бу сафар жанг қилмоқчиман".