Дания - гандбол бўйича жаҳон чемпиони!

Ҳисоб бўйича 26-жаҳон чемпионати 10 январь куни Германиянинг Берлин ҳамда Даниянинг Хернинг шаҳарларида старт олган эди. Мусобақа тарихида илк бор жаҳон чемпионати икки мамлакатда ташкил этилди. 

Тўртта гуруҳда ўтказилган мусобақа якунида ушбу спорт тури ватани ҳисобланган Дания терма жамоаси ўз тарихида илк бор жаҳон чемпионига айланди. Шу билан бирга биринчилардан бўлиб, Токио-2020 Олимпия ўйинларига тўғридан-тўғри йўлланмани ҳам қўлга киритди. 

Дания терма жамоаси Хернинг шаҳрида ўтган ҳал қилувчи финал учрашувида норвегиялик қўл тўпи усталарини йирик 31:22 ҳисобида таслим этишди. Ғолиб жамоа таркибида Миккель Хансен рақиб дарвозасини етти бор ишғол қилиб, мусобақанинг энг фойдали ўйинчиси деб топилди. 

Дания Рио-2016 ўйинларида Олимпиада чемпиони бўлган эди. 2008 ва 2012 йилларда эса Европа чемпионатини ютган. Улар илк бор жаҳон чемпиони деган номга сазовор бўлишди. Германиядан бир очко фарқ, яъни 26:25 ҳисобида устун келган Франция терма жамоаси жаҳон чемпионатининг бронза медалини қўлга киритди.