Давлат Бобонов жаҳон чемпионатига бора олмайди

Бир неча кун аввал Ўзбекистон терма жамоасининг Доҳага йўл оладиган таркиби эълон қилинган эди. Афсуски, терма жамоамиз етакчиларидан бири, Токио Олимпиадасининг бронза медали совриндори, жаҳон чемпиони Давлат Бобоновнинг Қатарга бормаслиги расман ойдинлашди. 

Бунга дзюдочимизнинг жароҳати сабаб бўлмоқда. Жароҳатлар спортнинг ажралмас бўлаги. Ҳеч ким ундан кафолатланмаган. Бобонов куни кеча Москвада малакали шифокорлар кўригида бўлиб қайтди. Ташхис - умуртқа чурраси (грижа). 

Шифокорлар тавсиясига кўра дзюдочимиз жаҳон чемпионатида иштирок эта олмайди. У Тошкентда шифокор назоратида муолажаларни давом эттиради. Давлат Бобоновга тезроқ тузалиб, сафга янада кучли бўлиб қайтишини тилаймиз.