Даврон Файзиев: «Ҳасанбой Дўсматов бу жангда ҳамма жиҳатдан устун келдию, ҳакамлар ундан ғалабани тортиб олди, дейиш ҳам нотўғри»

«Боксда субъектив баҳоланади, ҳамма ҳар хил кўради. Зарбанинг кучи, рақибга қай даражада талофат етказганини ҳам ҳамма турлича кўради. Мутахассис кўзи бошқа, мухлис кўзи бошқа. Ҳаттоки, уч нафар мутахассис бўлса, уч хил кўриши мумкин. Бунинг ягона бир ҳисоблаш тизими ишлаб чиқилмаган. Шунинг учун ҳамиша баҳс бўлади. Масалан, мени кўзимга Ҳасанбой биринчи раундда яхшироқ жанг қилгандек кўринган бўлиши мумкин, бошқа мутахассис бошқача фикр билдириши мумкин. Ҳасанбойда ҳам яхши эпизодлар бўлди. Лекин 100 % Дўсматов бу жангда ҳамма жиҳатдан устун келдию, ҳакамлар унинг ғалабасини тортиб олди, дейиш ҳам нотўғри. 

Бибосинов ҳам қарши ҳужумда ача-мунча аниқ зарбалар берганди. Буни тан олишимиз керак. Менга ҳамюртимизнинг фаол ҳаракатланиши кўпроқ ёқди. Агар менга қўйиб беришганида, минимал фарқ билан Ҳасанбой ғалаба қозонди, деган бўлар эдим. Аммо, айтганимдек, жуда баҳсли ҳолат. Фоизларда ҳисобласак, мухлис бўлганим учун ҳам 51:49 ҳисобида шу Ҳасанбойга ғалабани берган бўлардим», - деди Файзиев мухбиримиз билан суҳбатда.