Дайибекова, Плиего, Обвинцева каби қиличбозларимиз лицензион турнирда иштирок этиш учун курашишмоқда

Ҳозирда терма жамоамиз мазкур турнирга қизғин ҳозирлик кўрмоқда.

Қайд этиш жоиз, мусобақада жаҳон рейтинги орқали Олимпиадага йўлланма ололмаган давлатлар ҳар бир йўналишда бир нафардан спортчини рўйхатдан ўтказиши мумкин. Бир қатор йўналишларда терма жамоамизда ички рақобат кучли. Шу боис мураббийлар ҳозирда кимнинг тайёргарлиги юқори даражада эканлигини кўриши учун терма жамоа вакиллари орасида саралаш мусобақаси ўтказилмоқда. Бугун МОҚ ҳамда Ўзбекистон қиличбозлик федерацияси раиси Рустам Шоабдураҳмонов мазкур жараённи кузатиб бориш учун терма жамоа базасига ташриф буюрди. Унга МОҚ раиси ўринбосари Шерзод Ташматов ҳамроҳлик қилди.

Мазкур саралаш мусобақаси 15-17 апрель кунлари аёллар ўртасида сабля йўналишида бўлиб ўтади. Саралаш жангларига 13 нафар спортчи жалб этилган бўлиб, улар орасида асосий рақобат Зайнаб Дайибекова, Паола Плиего ҳамда Яна Обвинцева ўртасида кечиши кутилмоқда. Шаффофлик учун беллашувларни хориждан чақирилган халқаро тоифадаги ҳакамлар бошқариб боришмоқда.

Яна бир аҳамиятли жиҳати, мазкур мусобақа аввалидан ўз фикр ва маслаҳатлари билан ўртоқлашиш учун Пан-Америка қиличбозлик конфедерациясини бошқариб бораётган ҳамюртимиз Виталий Логвин ҳам айни вақтда Тошкентда бўлиб турибди. Эслатиб ўтамиз, лицензион мусобақада фақат олтин медаль соҳибларигина Токио-2020 Олимпиадаси иштирокчисига айланади.