Дэвис Кубоги. Бельгия - Ўзбекистон учрашувининг таркиблари, вақти ва қандай кортда ўтказилиши маълум бўлди

Терма жамоамиз 1-Жаҳон гуруҳида ўз ўйинларини ўтказади. Вакилларимизга аввал хабар берганимиздек, биринчи бўлиб Бельгия терма жамоаси рақиблик қилади. Учрашув 16-17 сентябрь кунлари Бельгиянинг Хассельт шаҳрида жойлашган "Sporthalg Alverberg" аренасидаги ёпиқ хард кортларида ўтказилади.

Аҳамиятлиси, мазкур ўйинлар учун терма жамоалар таркиби ҳам аниқ бўлиб улгурди:

Ўзбекистон: Ҳумоюн Султонов, Сергей Фомин, Денис Истомин, Максим Шин, Амир Милушев. Жамоа сардори - Денис Истомин.

Бельгия: Давид Гоффин, Киммер Коппеанс, Ёрис де Лур, Сандер Жилле, Йоран Влиеген. Жамоа сардори - Стив Дарцис.

Жамоалар шу кунгача ўзаро тўқнаш келмаган. Улар ўртасидаги илк кунги учрашув Тошкент вақти билан соат 12:00 да бошланса, 17 сентябрь куни ўтадиган ўйинлар соат 13:00 да бошланиши кутилмоқда.

Эслатиб ўтамиз, Ўзбекистон теннис терма жамоаси 3-4 февраль кунлари "Дэвис Кубоги"нинг 2023 йилги мавсуми финал босқичи учун ўтиш ўйинида АҚШ термасига мағлуб бўлган эди.