Дэвис кубоги. Боснияга мағлуб бўлган Ўзбекистон терма жамоасининг кейинги рақиби маълум!

Теннис бўйича Ўзбекистон терма жамоаси февраль ойи бошида I Жаҳон гуруҳи плей-офф босқичида Босния ва Герцеговинани қабул қилиб, 1:3 ҳисобида имкониятни бой берган эди. Бу мағлубиятдан кейин жамоамиз яна II Жаҳон гуруҳига қайтди. 

Қуръа натижасига кўра, теннисчиларимизнинг навбатдаги рақиби Гонконг терма жамоаси бўлади. Ўйинлар сентябрь ойида рақиб майдонида ташкил этилади. Ҳозирча турнирга қайси мажмуа ва қандай турдаги кортлар мезбонлик қилиши, аниқ сана ҳамда вақт номаълум. 

Жамоалар шу кунгача ўзаро ўйин ўтказмаган. Гонконг терма жамоаси сўнгги ўйинини февраль ойида II Жаҳон гуруҳи плей-офф босқичи доирасида Намибияга қарши ўтказиб, 3:2 ҳисобида ғолиб бўлган эди.

Маълумот учун, Ўзбекистон терма жамоаси "Дэвис кубоги" рейтингида айни дамда 265,5 очкога эга бўлган ҳолда 45-ўринни эгаллаб турибди. Гонконг эса рейтингда 55-ўринга жойлашган.