Дэвис кубоги. Ўзбекистон терма жамоасининг навбатдаги рақиби маълум бўлди. Тошкентда яна теннис байрами бўлади!

Ўзбекистон терма жамоаси Польшага қарши мағлубиятидан сўнг айнан II гуруҳга тушиб кетган эди. Эндиликда ҳамюртларимизнинг ушбу гуруҳдаги ўйини сентябрь ойида Эстонияга қарши бўлиб ўтади.

Аҳамиятлиси, Эстонияга қарши ўйинлар Тошкент шаҳрида ўтказилиши маълум бўлди. Ҳозирча ўйинларнинг расмий санаси ва айнан қайси аренада ўтказилиши бўйича хабарлар мавжуд эмас.

Эслатиб ўтамиз, Ўзбекистон теннис терма жамоаси Дэвис кубогидаги сўнгги ўйинини жорий йилнинг февраль ойида I Жаҳон гуруҳига саралаш доирасида Полшага қарши ўтказиб, 0:4 ҳисобида имкониятни бой берган эди. Эстония эса ўзининг охирги ўйинида Эронни 3:1 ҳисобида мағлуб этиб, II Жаҳон гуруҳига йўл олган эди. 

Жамоалар шу кунгача бирор марта ўзаро тўқнаш келмаганини таъкидлаш лозим.

Маълумот ўрнида, Ўзбекистон терма жамоаси айни пайтда Дэвис Кубоги рейтингида 42-ўринни эгаллаб турибди. Эстония эса ушбу рейтингда 57-ўринда қайд этилган.