"Дэвис Кубоги". Ўзбекистоннинг Босния ва Герцоговина билан ўйин учун таркиби маълум

I Жаҳон гуруҳи учун плей-офф босқичи доирасида ўтказиладиган баҳсда терма жамоамиз шарафини ҳимоя қиладиган теннисчиларимиз номи аниқ бўлди. 

Унга кўра, мазкур қарама-қаршиликда Ҳумоюн Султонов, Сергей Фомин, Максим Шин ва Раҳимбек Иброҳимов таркибимиздан ўрин олган. 

Ўйинлар 31 январь - 1 февраль кунлари пойтахтимиздаги Республика Олимпия захиралари теннис мактаби ёпиқ кортларида ташкил этилади. Илк кунги учрашувлар соат 13:00да, 1 февралдагиси эса 11:00 да бошланади.

Ўзбекистон терма жамоаси ушбу қарама-қаршиликда ғалаба қозониш орқали яна I Жаҳон гуруҳига қайтиши мумкин.

Жамоалар шу кунгача ўзаро ўйин ўтказишмаган. Босния ва Герцеговина терма жамоаси сўнгги учрашувини ўтган йилнинг сентябрида I Жаҳон гуруҳи доирасида Хитой Тайпейига қарши ўтказиб, 2:3 ҳисобида имкониятни бой берган эди.