Динара Сафина Тошкентда ёш теннисчилар учун мастер-класс ўтказди (ФОТОГАЛЕРЕЯ)

Мазкур тадбир ITF W15 Ташкент халқаро аёллар теннис турнири доирасида ташкил этилди.

Динара Сафина мастер-класси ўнлаб ёш спортчилар, мураббийлар ва теннис ихлосмандларини бир жойга тўплади. Иштирокчилар афсонавий теннисчи билан бевосита мулоқот қилиш, саволлар бериш ва у билан биргаликда кортда машқ ўташ имкониятига эга бўлишди.

Машғулот давомида Динара техника, психологик тайёргарлик ва интизомнинг аҳамияти ҳақида сўзлаб, муваффақият сири ўйинга муҳаббат ва меҳнатсеварликдан бошланишини таъкидлади. 

Машғулотдан сўнг матбуот анжумани, фотосессия ва автограф-сессия ташкил этилди, унда спортчи журналистлар ҳамда ёш теннисчилар саволларига жавоб берди.

"Энг муҳими — ҳар сафар кортга чиққанда жараёндан завқ олиш. Муҳим нарса фақат ғалаба эмас, балки ўсиш ва ўзингга ишончдир. Мен ўзбекистонлик болаларнинг кўзида ўзим бошлаган пайтдаги иштиёқни кўрдим", — деди Динара Сафина иштирокчилар билан суҳбат чоғида.