Дияр Нургожай UFC'даги кейинги жангини Қатарда ўтказади

У 21 ноябрь куни Қатар пойтахти Доха шаҳрида ўтказиладиган UFC Fight Night турнирида америкалик Алик Лоренцга қарши октагонга чиқади. Бу ҳақда журналист Нолан Кинг хабар берди.

Лоренц UFC’даги илк расмий жангини айнан Нургожайга қарши ўтказади. У ташкилот билан Dana White’s Contender Series’даги муваффақиятли чиқишидан сўнг шартнома имзолаганди.

Қатардаги турнирнинг асосий жангида UFC’нинг собиқ ярим оғир вазн чемпиони Иржи Прохазка мағлубиятсиз янги зеландиялик Навахо Стирлинг билан тўқнашади.

29 ёшли Нургожайнинг профессионал рекордида 12 та ғалаба ва 2 та мағлубият бор. У UFC’да тўртта жанг ўтказиб, иккитасида ғалаба қозонган ва иккитасида мағлуб бўлган. 2025 йилда қозоғистонлик жангчи Брэндсон Рибейро ва Уран Сатибалдиевга ютқазгани ёдимизда. 2026 йилда эса кетма-кет икки ғалаба қайд этди: аввал Рафаэль Тобиасни ҳакамларнинг якдил қарори билан мағлуб этди, 8 августдаги сўнгги жангида эса Бруно Лопесни нокаутга учратди.

29 ёшли Алик Лоренц АҚШ вакили бўлиб, унинг профессионал рекордида 8 та ғалаба ва 2 та мағлубият бор. Америкалик атлет барча саккиз ғалабасини муддатидан олдин — еттитасини нокаут, биттасини бўғиш усули билан қўлга киритган.

Лоренц Dana White’s Contender Series’да икки марта иштирок этган. 2025 йил августда Абдул-Раҳмон Яхяевга 30 сонияда техник нокаут билан мағлуб бўлган. Шундан кейин у кетма-кет икки жангда ғалаба қозонган. 18 августдаги сўнгги жангида Лоренц Маҳамед Алини биринчи раунднинг 2:23-дақиқасида нокаутга учратиб, UFC билан шартнома тузган.