02 май 17:52
Янгиликлар
Диёра Келдиёрова: “Бор эътиборим Париж-2024 медалига қаратилган”
Қайд этиш жоиз, Олимпия ўйинларига қисқа фурсат қолганида Япония жамоаси ёпиқ тарзда тайёргарлик кўради. Бироқ Ўзбекистон ва Япония дзюдо федерациялари ўртасидаги илиқ муносабатлар сабаб кунчиқар юрт жамоаси истисно тариқасида фақатгина ҳамюртимизга ўз эшикларини очди. Спортчимиз билан боғланиб, машғулот жараёни, тўрт йилликнинг энг муҳим стартига кўраётган тайёргарлиги, режалари ҳақида сўрадик:
– Диёра, Япония йиғини қандай ўтмоқда? Машғулотларда Сизга ким ҳамроҳлик қиляпти?
– Кутганимиздек, машғулотлар аъло даражада ўтяпти. Федерацияларимиз ўртасидаги дўстона муносабатлар сабаб фақат мен Япония аёллар терма жамоаси билан ўз тажрибамни оширяпман. Бу ерда ҳар бир вазн тоифасида Япониянинг энг кучли дзюдочилари, жаҳон ва Олимпиада чемпионлари шуғулланяпти. Ишонаманки, ушбу йиғин янада ўсишим учун фойда беради. Сафарда менга мураббий Марко Шпиттка ва шифокоримиз ҳамроҳлик қиляпти.
– Қатнашган сўнгги мусобақангиз Гонконгдаги Осиё чемпионати ярим финалида айнан япон дзюдочисига имкониятни бой бердингиз. Мағлубиятнинг сабаби рақибни яхши билмаслигингизмиди ёки спорт формасида эмасмидингиз?
– Йўқ, бунинг сабаби спорт формада эмас. Биз доимий равишда машғулотлардамиз ва ҳолатимизни бир маромда ушлаб турибмиз. Спортда ҳамма нарса бўлиши мумкин. Очиғини айтсам, Осиё чемпионатидаги ҳакамликдан кўнглим тўлмади. Ўшанда қўшимча вақтда вазари баҳосини ишлаган эдим, лекин ҳакамлар бунга кўз юмишди. Қандай қилиб бундай вазиятга баҳо бермаслик мумкин, деб турган пайтим ўзим усулга тушиб қолдим.
– Япония йиғини қанча вақт давом этади? Шу билан Сизни Париж-2024 Олимпиадасида кўрамизми?
– Осиё чемпионати ва Олимпиада орасида катта вақт бор. Шунинг учун орада битта стартда иштирок этишим талаб этилади. Токио йиғини 10 кунга белгиланган. Олдинда турган Тожикистон ва Қозоғистондаги “Катта дубулға” турнирларини ўтказиб юбораман. Шу билан Абу-Дабида ўтадиган жаҳон чемпионати ва Париж-2024 ёзги Олимпия ўйинларида курашаман. Албатта, бор эътиборим Париж-2024 медалига қаратилган.
Фикрлар