Диёра Келдиёрова жаҳон чемпионати финалида + ФОТОГАЛЕРЕЯ

Дунёнинг 107 давлатидан дзюдочилар иштирок этаётган нуфузли мусобақанинг илк кунги саралаш беллашувлари якунланиб, кечки дастурда медаллар учун татамига чиқадиган спортчилар маълум бўлди. 

Қувонарлиси, финал дастурида ҳамюртимиз Диёра Келдиёрова ҳам бўлади. -52 кг вазн тоифасида юртимиз шарафини ҳимоя қилаётган Диёра финалгача барча саралаш беллашувларини муддатидан аввал якунлашга муваффақ бўлди. 

У Ана Виктория Пулиз (Хорватия), София Фиора (Аргентина), Бинта Ндиайе (Швейцария) ҳамда Ҳибики Шираиши (Япония)ни мағлуб этишни уддалади. Энди Келдиёрова жаҳон чемпионатининг олтин медали учун италиялик Одетте Гюффридага қарши татамига чиқади. 

Одетта 1/2 финалда Токио-2020 Олимпиадасининг кумуш медали совриндори, франциялик Амандин Бушардан устун келган. Диёра ва Одетте бир-бирини жуда яхши билади. Улар ўтган йили Баку "Катта Дубулға" турнири финалида ҳам учрашишган ва ўшанда Келдиёрова ғалаба қозониб, чемпионлик шоҳсупасига кўтарилган эди.