Дмитрий Бивол фаолиятини якунлаш ҳақидаги саволга жавоб қайтарди

"Сўнгги бир неча йилдан бери ҳар бир жангга худди охиргисига чиқаётгандек тайёрланаман. Доим: “Эҳтимол бу охирги жангим бўлади”, деб ўйлайман. Бироз руҳан, баъзида эса жисмонан чарчайсан.

Менда ҳар доим 35 ёшга борганда фаолиятни якунлаш керак деган қараш бўлган. 35-36 ёшимда ўзимни боксчи сифатида тасаввур қилмаганман. 20 ёшимда: “30-40 ёшгача бокс тушишни истамайман. Бошқа соҳада ёш мутахассис бўлиб ишлашни, ҳаётда янги саҳифа очишни хоҳлайман", деб ўйлардим.

Яна қанча вақт бокс тушишимни билмайман. Буни вақт кўрсатади. Ҳозир баъзан ўзимни 25 ёшдагидек ҳис қиламан, баъзан эса 50 ёшли одамдек.

Шундай пайтлар бўладики, оғир машғулотлардан кейин эрталаб уйғониб, зўрға юрасан. Эгилиш ҳам, тик туриш ҳам қийин бўлади, ҳамма жойинг қаттиқ оғрийди. Шунда: “Эҳ, бутун умрим давомида меҳнат қилдим-ку. Нега ҳали ҳам ҳамма жойим оғрияпти?” деб ўйлаб қоласан", — деди Бивол.