Дмитрий Бивол навбатдаги рақиби ва жанг санасини билиб олди

Россиялик боксчи ўзига тегишли IBF чемпионлик камарини мажбурий даъвогар Михаэл Айфертдан ҳимоя қилади. Журналист ва инсайдер Ден Рафаэлнинг маълум қилишича, IBF ушбу жангни ўтказиш ҳуқуқи учун промоутерлик аукционини бекор қилган, чунки боксчилар вакиллари ташкилотни музокаралар давомида келишувга эришганликлари ҳақида хабардор қилган.

Тахминларга кўра, мазкур жанг 23 май куни Мисрнинг Гиза шаҳрида бўлиб ўтадиган бокс оқшоми доирасида ташкил этилади. Турнирнинг асосий воқеаси супероғир вазн тоифасида жаҳон чемпиони Александр Усик ҳамда афсонавий кикбоксчи Рико Верхувен ўртасидаги жанг бўлиши кутилмоқда.

Маълумот учун, 35 ёшли Дмитрий Бивол (24-1, 12КО) сўнгги бор 2025 йилнинг февраль ойида Артур Бетербиевни реванш жангида мағлуб этганди. Шундан сўнг, Бетербиев ва Бивол учинчи жанг ҳақида музокаралар олиб боришди, аммо бу муваффақиятсиз тугади. Август ойида Дмитрийнинг умуртқа поғонасида жарроҳлик амалиёти ўтказилди, шу сабабли у машғулотларда танаффус қилишга мажбур бўлди.

28 ёшли Михаэл Айферт (13-1, 5КО) 2023 йилда 40 ёшли собиқ жаҳон чемпиони Жан Паскални ҳакамларнинг якдил қарори билан мағлуб этиб, чемпионлик жангини ўтказиш ҳуқуқини қўлга киритган эди. Ўша пайтда IBF камари Артур Бетербиевга тегишли бўлиб, у Бивол билан бирлаштирувчи жанг ўтказиш учун мажбурий ҳимояни кечиктирди.