Доғистон ва АҚШ таомлари, миллион доллар... Хабиб UFC 280 учун жамоасини қандай "боқди"?

Ҳашамат ва бунинг натижасидаги фаровонлик

UFC 280 мусобақасининг энг ажабланарли воқеаларидан бири Ислам Махачев ва Хабиб Нурмагомедовнинг Чарльз Оливейрага қарши жанг учун йиғинда бир миллион доллардан ортиқ маблағ сарфлагани ҳақидаги маълумот бўлди.

Пул кимнинг чўнтагидан "кетгани": Хабиб, шайхлар ёки баъзи ҳомийларданми буниси номаълум, аммо йирик маблағ сарфлангани шубҳасиз. Йигирмадан ортиқ доғистонликлар ажойиб квартираларда яшаб, Бирлашган Араб Амирликлари шаҳзодасининг шахсий спорт залида машғулот ўтказдилар. Қирол каби таомландилар.

Жамоага олиб келинган америка-фаластинлик жангчи Белал Муҳаммад ҳамон Хабибнинг "совғалари"дан узоқлаша олмаяпти. У яқинда Bryan Callen подкастида беш ҳафталик тайёргарлик давомида уларнинг жамоаси жадвали қанчалик ажойиб кўриниш олгани ҳақида гапирди.

"Мен Хабиб жамоаси билан ажойиб ўтган беш ҳафтани ўтказдим. Машғулотдан сўнг ҳаммамиз бирга намоз ўқишга бордик. Масжид зал ёнида эди. Бу ажойиб эди, чунки... Бу ерда [Чикагода] менинг ажойиб жамоадошларим бор, биз биродарлармиз, лекин улар насронийлар. Мен намоз ўқисам, улар менга қарайди, лекин намоз ўқимайди. Бу йигитлар билан эса биз бир вақтнинг ўзида худди шундай иш қилдик, яъни намоз ўқидик. Бу сизнинг орангиздаги алоқани мустаҳкамлайди.

Кейин ҳаммамиз бирга тушликка бордик. Тушлик эса пфффф... "эпик" эди. 10 га яқин турли таомлар, Доғистон ва Америка таомлари. Ҳар бир таом учун уларда алоҳида ошпаз бор эди, бу шунчаки ақлдан оздиради. Нонушта, тушлик ва кечки овқатда ҳам шундай бўлди. Хабибнинг биз учун қилган иши ажойиб эди. Ширинликлар учун алоҳида катта стол. Унинг жамоасида 20 киши бор эди, барча йигитлар вазн қила олди, йигитлар максимум даражада овқатланишди. Мен кичик порсияларда овқат ейишга, диетага амал қилишга ҳаракат қилдим, лекин...

Улар сизга ўзингиз хоҳлаган ҳамма нарсани беришади. "Кўпроқ қизил икра олсам бўладими?" Эртаси куни эса сизга бир катта лосос солинган идиш олиб келишади. Ёки криветка, хоҳлаганингизча. Хабиб бу йиғинга миллион доллардан ортиқ маблағ сарфлаган. У буни қилиши шарт эмас эди, лекин у бизнинг орзуларимизни амалга оширишимизни хоҳлади".