Достон Ёқубов 2017 йилнинг энг яхши оғир атлетикачиси!

Пойтахтимиздаги “Миран” меҳмонхонасида бўлиб ўтган кечада Ўзбекистон Республикаси Жисмоний тарбия ва спорт давлат қўмитаси раиси Рустам Қурбонов, Миллий олимпия қўмитаси Бош котиби Ойбек Касимов ва мамлакат оғир атлетика федерацияси раиси Ботир Закировлар иштирок этишди.

Тадбир давомида оғир атлетика федерацияси бир неча номинациялар бўйича ғолиблар номини эълон қилди ва уларни диплом ва эсдалик совғалари билан тақдирлади. Дастлаб Р.Қурбонов жорий йилнинг 30 ноябрь-6 декабрь кунлари АҚШнинг Анахайм шаҳрида бўлиб ўтган катталар ўртасидаги жаҳон чемпионатининг ғолиб ва совриндорларига давлатимиз томонидан ажратилган пул мукофотларини топширди.

Хабарингиз бор, океан ортида бўлиб ўтган жаҳон чемпионатида Ўзбекистон терма жамоаси ўз тарихида илк маротаба мусобақани кучли учликда якунлади. Достон Ёқубов 69 кг. вазн тоифасида олтин медалга сазовор бўлган бўлса, 94 кг. вазн тоифасида Фарходбек Собиров кумуш медалини қўлга киритди. Иван Ефремов эса 105 кг. вазнда биттадан кумуш ва бронза медалларига эга чиқди. Шунингдек, Адҳамжон Эргашев ( 62 кг.) делегациямиз ҳисобига бронза медалини қўшиб қўйди.

Тақдирлаш маросимида олтин медаль соҳиби Достон Ёқубовга 12 000, Фарходбек Собиров ва Иван Ефремовларга 6 000 ва Адҳамжон Эргашевга 3 000 АҚШ доллари миқдорида мукофот пулларига сертификат топширилди.

Достон Ёқубов шунингдек, Ўзбекистон оғир атлетика федерацияси томонидан “Йилнинг энг яхши спортчиси” деб эълон қилинди ва диплом ҳамда эсдалик совғаси билан тақдирланди. Унинг устози Фарход Мирзаджанов эса “Йилнинг энг яхши мураббийи” номинациясида ғолиб чиқди ва федерация раҳбарияти томонидан мукофотланди.

Федерациянинг рағбатлантирувчи мукофотлари кўп йиллик самарали меҳнатлари учун спорт фахрийси, Ўзбекистонда хизмат кўрсатган спорт устози Эркин Каримов ва Ўзбекистон ёшлар терма жамоаси катта мураббийи Борис Савченкога топширилди.

Федерациянинг Хоразм вилояти бўлими терма жамоаларимизга муносиб номзодлар етиштириб беришдаги алоҳида фаоллиги ва минтақада спортнинг ушбу тури тараққиётига қўшган ҳиссаси ҳисобга олиниб “Йилнинг энг яхши ҳудудий федерацияси” номинациясида ғолиб деб топилди.

Тадбир давомида шунингдек, Ўзбекистон оғир атлетика федерацияси раиси Ботир Закиров ўтказилган халқаро семинар иштирокчилари ва меҳмонлари - Милан Михайлович (Сербия), Владимир Салтиков (Россия) ва Кулман Нысанбаева (Қозоғистон)ларга федерациянинг ташаккурномалари ва миллий урф одатларимизга кўра эсдалик совғаларини топширди.