Дрикус Дю Плесси ва Дэн Хукер UFC P4P рейтингида кўтарилишди

Жумладан, UFC 305 турнирида ғалабага эришган Дрикус Дю Плесси ва Дэн Хукер вазн тоифасидан қатъий назар P4P рейтингида кўтарилишга эришишди. Исраэль Адесаньяга қарши жангда ўрта вазндаги UFC чемпионлик камарини муваффақиятли ҳимоя қилган Жанубий Африка Республикаси вакили беш поғонага юқорилаб, 6-ўринни банд этди. 

Дю Плессига имкониятни бой берган нигериялик жангчи P4P рейтингида аксинча, 13-поғонадан 15-ўринга пастлади. Матеуш Гамротни очколар ҳисобига кўра мағлубиятга учратган Дэн Хукер эса 11-поғонадан 5-ўринга юқорилади. Гамрот эса енгил вазн тоифаси рейтингида 5-ўриндан 8-поғонага пастлади. 

UFC режасига кўра Дрикус Дю Плессининг кейинги жанги Шон Стриклендга қарши ўтказилиши кутилмоқда. Дрикус январь ойида Шонни мағлубиятга учратганди. Дэн Хукер эса кейинги жангини Чарльз Оливейрага қарши ўтказиши мумкин. Бразилиялик аралаш яккакураш устаси UFC енгил вазн тоифаси рейтингида иккинчи ўринни банд этган.