Дуатлон бўйича Ўзбекистон кубоги профессионал ва ҳаваскорларни ўзида жамлади

Унда ҳаваскор ва профессионал спортчилар ўзаро баҳс олиб боришди.

Юртимизда оммавий спорт тарғиботини янада кучайтириш йўлида ташкил этилаётган мазкур мусобақа бир қатор ёш тоифаларида ҳаваскор ва профессионал спортчилар иштирокида ўтказилди. Ҳозирда сузиш беллашувларини ўтказиш спортчиларнинг саломатлиги учун бироз хавфли бўлгани учун атлетлар югуриш ва велопойга бўйича куч синашишди.

Мусобақада юртимизнинг турли ҳудудларидан ташриф буюрган 100 нафардан ортиқ спортчилар иштирок этишди. Тантанали тақдирлаш маросимида Ўзбекистон Республикаси Президенти ҳузуридаги Хавфсизлик кенгаши котиби, Ўзбекистон триатлон федерацияси раиси Виктор Маҳмудов, Ўзбекистон Миллий Олимпия қўмитаси раиси Рустам Шоабдураҳмонов ва Бош котиб Ойбек Касимов иштирок этиб, мамлакатимизда спорт тарғиботи йўлида ўз ҳиссасини қўшиб келаётган барча қатнашчиларга самимий миннатдорчилик билдиришди.

Якунда мусобақа ғолиб ва совриндорлари муносиб тақдирланишди. Таъкидлаш жоиз, бу каби мусобақаларнинг ташкил этилиши ёшларнинг спортга бўлган қизиқиш ва меҳрларини янада кўпайтириш йўлида муҳим аҳамиятга эга.