Дунёнинг биринчи ракеткаси Штутгартда 1/4 финалга чиқди

Porsche Tennis Grand Prix турнирида 1/4 финал иштирокчилари маълум бўлди. Сайёрамизнинг биринчи рақамли теннис маликаси Ига Свёнтек бош соврин учун асосий даъвогар ҳисобланмоқда. Польшалик теннисчи иккинчи даврада WTA рейтингида 30-ўринни эгаллаб турган бельгиялик Элизе Мертенсни мағлуб этди - 6/3, 6/4.

Бу теннисчиларнинг ўзаро ўтказган илк учрашуви эди. Тўқсон тўрт дақиқалик баҳсда иккала теннисчи ҳам биттадан эйс зарбасини ижро этган. Қўшхатолар Элизеда биттага кўпроқ бўлди - 2 га 1. Свёнтек 4 та, Мертенс эса 2 та брейкни амалга оширган. Ига ушбу турнирнинг амалдаги чемпиони ҳисобланади.