Дунёнинг собиқ биринчи ракеткаси Симона Халеп фаолиятини якунлади

Ҳозирда WTA рейтингида 870-поғонада бораётган Халеп Клуж-Напока шаҳридаги WTA 250 тоифасига кирувчи турнирнинг биринчи босқичида италиялик Лючия Бронцеттига 1/6, 1/6 ҳисобида имкониятни бой бериб қўйди. Ушбу учрашувдан сўнг Симона аренага йиғилган ватандошлари билан хайрлашди ва профессионал теннисчилик фаолиятини якунлаганини эълон қилди. 

Халеп 2022-2024 йиллар оралиғида ижобий допинг-тест натижаси туфайли барча фаолиятдан четлатилган эди. Ўтган йили жазо муддатини ўтаб кортга қайтган Симона 6 та учрашув ўтказиб, 5 тасида мағлубиятга учради. 

Маълумот учун, 2006 йилда профессионал фаолиятини бошлаган Симона Халеп жами 839 та учрашув ўтказиб, 593 тасида (71%) ғалаба қозонди. Салкам 20 йиллик фаолияти мобайнида у фақат мукофот пулларининг ўзидан 40,5 млн АҚШ доллари ишлаб олди. 2018 йилда руминиялик теннисчи "Роллан Гаррос", 2019 йилда Уимблдон турнирида бош совринни қўлга киритди.