Дю Плесси жамоаси Анкалаев билан жанг таклифини рад этган

Жангчининг мураббийи Морне Виссер бу таклифни рад этганини маълум қилди.

Виссернинг айтишича, тахминан уч ҳафта аввал UFC бир оқшомда Дю Плесси, Анкалаев, Иржи Прохазка ва Навахо Стирлинг иштирокида жанглар ташкил этишни таклиф қилган. Режага кўра, ушбу жанглар ғолиблари кейинчалик ўзаро тўқнашиши, якуний ғолиб эса ярим оғир вазн чемпиони Карлос Улбергга қарши титул жангини қўлга киритиши керак эди.

Бироқ Виссер Дю Плессининг ярим оғир вазнга ўтишини тезлаштиришни истамагани учун таклифни рад этган. Унинг сўзларига кўра, жамоа келажакда янги вазн тоифасига кўтарилишни режалаштирмоқда, аммо аввал ўрта вазндаги чемпионлик камарини қайтариб олиб, уни ҳимоя қилиш ниятида.

«Ярим оғир вазнга кўтарилиш осон. Аммо Дрикюсни ярим ўрта вазндан ўрта вазнга ўтказишим учун бир йил вақт кетган. Биз албатта ярим оғир вазнга ўтамиз, лекин буни босқичма-босқич амалга оширамиз. Бу аниқ режаларимизда бор. Бироқ аввал ўрта вазндаги камарни қайтариб олиб, кейин уни ҳимоя қилмоқчимиз», — деди Виссер Fight Forecast нашри билан суҳбатда.