Дюссельдорфни забт этган ўзбек ўғлони бугун яна бир ёшга улғайди

Муҳаммадкарим Ҳуррамов - 1997 йилнинг 4 апрель куни Сурхондарё вилоятида таваллуд топган. Яъни, полвонлар юртидан! Дзюдо спорт турини танлаши тасодиф эмас. Воҳанинг аксарият ўғлонлари ё курашчи, ёки дзюдочи бўлади.  

Тасодифни қарангки, бугун 23 ёшга тўлган дзюдочимиз 23 февраль куни Германиянинг Дюссельдорф шаҳрида ўтказилган "Катта Дубулға" туркумига кирувчи турнирда барча рақибларини мағлубиятга учратиб, олтин медаль соҳиби ҳамда қимматли 1000 рейтинг очкосига эга бўлганди. 

Мусобақа финалигача Франция, Латвия, Мўғулистон, Озарбайжон, Бразилия вакилларини мағлубиятга учратган Муҳаммадкарим ҳал қилувчи беллашувда озарбайжонлик Елмар Гасимовдан устун келган эди. Дзюдочимиз айни пайтда Токио-2020 Олимпиадаси рейтингининг йўлланма зонасида бормоқда.  

Фурсатдан фойдаланиб, Ўзбекистон дзюдо федерацияси раҳбарияти, мураббийлар штаби ва спортчилар номидан Муҳаммадкарим Ҳуррамовни бугунги таваллуд айёми билан чин қалбдан муборакбод этамиз. Унга сиҳат-саломатлик, узоқ умр, оила аъзолари бахтига ҳамиша соғ бўлиб юришини тилаймиз. Спортчилик фаолиятида эса Олимпиада медалини қўлга киритишига тилакдошмиз ва бунга ишонамиз!