Дзюдо бўйича Ўзбекистон аёллар терма жамоасининг машғулоти давом этмоқда ФОТОРЕПОРТАЖ

Терма жамоа асосини катталар ва ёшлар ўртасида ўтказилган Ўзбекистон чемпионати якунлари бўйича саралаб олинган дзюдочилар ташкил этмоқда. Ўзбекистон дзюдо федерация қошидаги залда ўтказилаётган машғулотларда асосий эътибор умумий жисмоний тайёргарлик ҳамда спарринг баҳсларига қаратилмоқда. Ушбу йиғин Тошкент "Катта Дубулға" турнирига тайёргарлик вазифасини ўтаб беряпти.

Ўзбекистон Миллий олимпия қўмитаси раис ўринбосари, Ўзбекистон дзюдо федерацияси раиси Азизжон Камилов аёллар терма жамоасининг машғулотини бевосита кузатди. Машғулот якунланганидан кейин эса мураббийлар ва дзюдочи-қизларимиз билан мулоқотга киришди. 

Федерация раиси биринчи навбатда дзюдочиларимизнинг муаммолари билан қизиқди. Чунки, спортчи ҳар қандай муаммо ва камчиликлардан ҳоли бўлган ҳолатда мусобақага тайёргарлик кўриши лозим. Акс ҳолда ўтказилаётган машғулотларнинг фойдаси бўлмайди. Шунингдек, федерация раҳбари 5-7 март кунлари пойтахтимиздаги "Ҳумо" аренада ўтказилувчи Тошкент "Катта Дубулға" турнирида тўлиқ таркибда иштирок этувчи қизларимизга ғалаба ва омад тилаб, бу мусобақа уларга ўзларини кўрсатишлари учун яхшигина имконият эканини урғулади. Ўз ўрнида терма жамоамиз аъзолари ҳам берилаётган эътиборга жавобан Тошкент "Катта Дубулға" турнири, йил давомида ўтказиладиган бошқа мусобақаларда ҳам ишончни оқлаш учун астойдил ҳаракат қилишларини айтишди.