Дзюдо. Европа Очиқ кубогида 2та олтин медал қўлга киритдик+ФОТО

Кеча бошланган нуфузли мусобақада 40та давлатдан 430 нафар дзюдочилар татамига чиқишяпти. Улар орасида Беҳзод Тўрабоев бошчилигидаги Ўзбекистон терма жамоаси аъзолари ҳам бор. 

Қувонарлиси, мусобақанинг биринчи куни ҳамюртларимиз 2та олтин медални қўлга киритишди. Жароҳат сабаб узоқ муддат мусобақалардан четда бўлган Шарофиддин Лутфуллаев қайтишини чиройли ғалаба билан нишонлади. У -60 кг вазнда барча рақибларини мағлуб этиб, шохсупанинг энг юқори поғонасига кўтарилди. 

Яна бир вакилимиз -73 кг вазн тоифасидаги Ҳикматилло Тўраев ҳам олтин медал соҳибига айланди. Ҳар икки дзюдочимиз 100 рейтинг очкосини қўлга киритишди. Регламентга кўра, ғолиблар 100, кумуш медал соҳиблари 70, бронза медал эгалари эса Токио Олимпиадаси учун қимматли 50 рейтинг очкосини ўз ҳисобларига қўшиб қўйишади.  

Бугун қолган дзюдочиларимиз ҳам медаллар йўлида татамига чиқишади. Куннинг иккинчи ярмида Европа Очиқ кубоги ўз якунига етади.