Дзюдо федерацияси Париж-2024 Олимпиадаси олдидан матбуот анжумани ўтказди + ФОТОГАЛЕРЕЯ

Бугунги кунда лицензияларни қўлга киритган барча ўзбекистонлик спортчилар Олимпия ўйинларига астойдил тайёргарлик кўришяпти. Албатта, улар орасида дзюдо бўйича Ўзбекистон терма жамоаси ҳам бор. 

Бугун куннинг иккинчи ярмида Ўзбекистон Миллий олимпия қўмитаси анжуманлар залида мамлакат дзюдо федерацияси томонидан Париж-2024 Олимпиадаси олдидан матбуот анжумани ташкил этилди. Унда Спорт вазири ўринбосари Шаҳрилло Маҳмудов, Миллий олимпия қўмитаси Бош котиби Ойбек Касимов, МОҚ раиси ўринбосари Шерзод Ташматов, МОҚ раиси ўринбосари, мамлакат дзюдо федерацияси раиси Азизжон Камилов, терма жамоа мураббийлари, олимпиада лицензиантлари ҳамда оммавий ахборот воситалари ҳозир бўлишди. Савол-жавобларга ўтиш олдидан А.Камилов олимпия ўйинларига кўрилаётган тайёргарлик юзасидан ўз фикрлари билан ўртоқлашди.      

- Куни кеча Халқаро дзюдо федерациясидан қувончли хабар олдик. Тақсимот қайта шакллантирилганидан кейин Шукуржон Аминовага ҳам Олимпиада лицензияси тақдим этилди. Бу билан Париж Олимпиадасида қатнашадиган дзюдочи қизларимиз сони 5 нафарга етди. Шу пайтгача энг кўпи билан икки нафар дзюдочи-қизимиз Олимпия ўйинларида иштирок этганди. Бу бўйича ҳам рекорд янгиланди. Эркаклар терма жамоамиз тўлиқ таркибда, яъни 7 дзюдочи билан, қизларимизнинг эса 5 нафари Олимпиадада қатнашади. Шунингдек, бу сафар ҳам жамоавий баҳсларда терма жамоамиз медаллар учун кураш олиб боради. Ўзбекистон дзюдо терма жамоаси умумий 13 та лицензияни қўлга киритди. Аёллар терма жамоасида хорижлик мураббийлар Марко Спиттка ва Мики Танака фаолият олиб боряпти. Албатта, бу мураббийларимизнинг ҳам хизматлари катта бўлмоқда. Токио Олимпиадасида Рамзиддин Саидов дзюдо баҳсларида ҳакамлик қилганди. Париж татамиларида яна бир тажрибали реферимиз Вячеслав Перетейко ишлайди, - деди федерация раиси. 

Шундан сўнг терма жамоа бош мураббийи Илиас Илиадис ҳам сўзга чиқди. 

- IJF мусобақалари расман якунланганидан кейин терма жамоамизнинг режа бўйича Олимпиадага тўғридан-тўғри тайёргарлиги бошланди. Грузиянинг Бакуриани, Хорватиянинг Пореч шаҳарларида халқаро ўқув-машғулот йиғинлари ташкил этилди. Қизларимиз шу кунларда дзюдо ватани Японияда машғулотларни давом эттиришяпти. Япония билан ҳамкорликдаги бу йиғин 6 июлгача давом этади. Режа бўйича 14 июль куни терма жамоамиз Франциянинг Нормандия вилоятига жўнаб кетади. Тайёргарликнинг сўнгги босқичи айнан ўша ерда бўлади. 25 июлдан дзюдочиларимиз спортчилар яшайдиган Олимпия шаҳарчасига киришади, - деди Илиадис.

Матбуот анжуманида иштирок этган оммавий ахборот воситалари ходимлари ўзларини қизиқтирган саволларга атрофлича жавоб олишди. Ўз ўрнида МОҚ Бош котиби Ойбек Касимов лицензиялар қўлга киритиш бўйича реокрд қайд этиб, режани ортиғи билан бажарган Азизжон Камилов бошчилигидаги Ўзбекистон дзюдо федерациясига миннатдорлик изҳор қилди ва Париж-2024 Олимпиадасида медаллар сони бўйича ҳам тарих янгиланишига тилик билдирди.   

Париж-2024 Олимпиадасига борадиган таркиб:

Эркаклар:

-60 кг: Достон Рўзиев 

-66 кг: Сардор Нуриллаев

-73 кг: Муроджон Йўлдошев  

-81 кг: Шарофиддин Болтабоев

-90 кг: Давлат Бобонов

-100 кг: Музаффарбек Тўрабоев

+100 кг: Алишер Юсупов

Аёллар:

-48 кг: Ҳалимажон Қурбонова

-52 кг: Диёра Келдиёрова 

-57 кг: Шукуржон Аминова

-70 кг: Гулноза Матниязова

-78 кг: Ирисхон Қурбонбоева