Дзюдочи Диёрбек Ўрозбоев тақдирланди

Ўзбекистон Республикаси Президентининг «Нуфузли халқаро спорт мусобақаларида юксак натижаларга эришган Ўзбекистон спортчиларини жамоат ва спорт ишларига кенг жалб этиш ҳамда спортчиларни ва уларнинг тренерларини рағбатлантириш тўғрисида»ги қарорида нуфузли халқаро спорт мусобақаларида юксак натижаларга эришган Ўзбекистон спортчиларини пул мукофотлари билан рағбатлантириш белгилаб қўйилган.

Ўзбекистон Республикаси Президентининг фармойишига биноан дзюдо бўйича жаҳон чемпионатида совриндор бўлган Диёрбек Ўрозбоевга пул мукофоти сертификатини 26 октябрь куни Ўзбекистон Республикаси жисмоний тарбия ва спорт давлат қўмитасида раис ўринбосари Фарҳод Турдиев спорт жамоатчилиги фаоллари ҳузурида дзюдочининг ўзи айни пайтда даволанишда экани боис устози Фарҳод Тўраевга топширди.

Дзюдо бўйича жаҳон чемпионати жорий йилнинг 28 августидан 3 сентябрга қадар Будапешт шаҳрида ўтказилган эди. Ўрозбоев 60 килограммгача вазн тоифасида муваффақиятли қатнашиб, Исроил, Ангола, Грузия ва Мўғулистонлик рақибларни енгган ва шоҳсупанинг учинчи поғонасидан жой олганди.

Дарвоқе, Диёрбек Ўрозбоев ўтган йили Рио-де-Жанейро шаҳри мезбонлик қилган ёзги олимпия ўйинларида терма жамоамизга дастлабки медальни туҳфа этган эди. Биз Диёрбекдан янги ва ёрқин ғалабаларни кутиб қоламиз.