Дзюдочиларимиз Абу-Даби турнирининг учинчи кунги баҳсларини бошлашди

Бугун нуфузли мусобақанинг учинчи кунида Ўзбекистон терма жамоасининг олти нафар аъзоси татамига чиқади. Умуман олганда, бугун эркаклар -90, -100, +100 кг, аёллар эса -78 ҳамда +78 кг вазн тоифаларида турнир медаллари ҳамда Токио-2020 Олимпиадасининг муҳим рейтинг очколари учун беллашишади. 

-90 кг вазн тоифасида юртимиз шарафини ҳимоя қилаётган Давлат Бобонов илк даврада Жаҳон кубоги соҳиби, шу йили ўтказилган Монреаль Гран-приси ғолиби словакиялик Милан Рэндлни мағлуб этишни уддалади. Унинг иккинчи босқичдаги рақиби қирғизистонлик Ерлан Шеров бўлади. 

-100 кг вазндаги дзюдочимиз Муҳаммадкарим Хуррамов эса ёшлар ўртасида жаҳон чемпиони, ўтган йиги Абу-Даби "Катта Дубулға" турнири бронза, Будапешт Гран-присининг кумуш медаллари соҳиби, германиялик Карл-Рихард Фрейдан устун келди. Ҳуррамов иккинчи даврада голландиялик Микаэль Коррелга қарши татамига чиқади. 

Афсуски, ушбу вазн тоифасидаги иккинчи вакилимиз Шерали Жўраев илк беллашувида россиялик кучли рақиб, шу йили Минск шаҳрида ўтказилган Европа Ўйинлари ғолиби, Екатеринбургда ўтган "Катта Дубулға" турнири чемпиони, ўтган йилги Анталия Гран-присининг кумуш медали совриндори Арман Адамьянга ютқазиб қўйди. 

Маълумот учун, Абу-Даби турнири ғолиблари ўз ҳисобларига 1000 рейтинг очкосини қўшиб қўйишади. Кумуш медаль соҳиблари 700, бронза медаль эгалари эса 500 рейтинг очкосига эга бўлишади.