Дзюдочиларимиз Европа Очиқ кубогида кучли тўртликдан жой олишди

European Judo Cup Orenburg 2019 мусобақасида Европа, Осиё ва Африка қитъаларининг жами 24 та давлатидан кўзга кўринган дзюдочилар татамига чиқишди. 

Ушбу нуфузли мусобақада Ўзбекистон терма жамоасининг 7 нафар аъзоси ҳам ўз имкониятини намойиш этди. Оренбург татамиларида Достон Рўзиев (-60 кг), Мусо Собиров, Шохруҳ Юсупов (иккиси ҳам -81 кг), Ербол Рустамов, Алишер Юсупов (иккиси ҳам +100 кг), Кимё Марасулова (-48 кг) ҳамда Нодира Йўлдошева (-78 кг) юртимиз шарафини ҳимоя қилишди. 

Қувонарлиси, улардан икки нафари якунда шохсупага кўтирилди. +100 кг вазн тоифасидаги полвонимиз Алишер Юсупов барча рақибларини мағлубиятга учратиб, олтин медални қўлга киритди. Алишер россиялик Александр Дзуцев, словакиялик Вито Драгич, яна бир мезбон спортчи Александр Шалимов ҳамда финал беллашувида татами эгаси Алан Дигуровни мағлубиятга учратди.

Ушбу вазн тоифасида беллашган яна бир ҳамюртимиз Ербол Рустамов эса бронза медали учун кечган баҳсда россиялик Александр Першинга имкониятни бой бериб қўйди. 

Терма жамоамизга иккинчи медални Мусо Собиров тақдим этди. -81 кг вазн тоифасида татамига чиққан Мусо бронза медали учун кечган баҳсда россиялик Сергей Скоробогатовдан устун эканлигини амалда исботлади. 

Шу тариқа, Ўзбекистон терма жамоаси 24 давлат орасида умумжамоа ҳисобида 1 тадан олтин ва бронза медали билан 4-ўринни эгаллади. Ўнта олтин, 8 та кумуш, 14 та бронза медалини қўлга киритган Россия терма жамоаси катта фарқ билан биринчи бўлди. Кучли учликдан Беларусь ва Франция терма жамоалари жой олишди.