27 апр 16:19
Янгиликлар

Дзюдо

Дзюдочиларимиз Осиё чемпионатининг учинчи куни 3 та медаль қўлга киритишди + ФОТОГАЛЕРЕЯ

Таиланд пойтахти Бангкок шаҳрида дзюдо бўйича катталар ўртасидаги Осиё чемпионати давом этмоқда.

Қитъа чемпионатининг учинчи куни оғир вазн тоифасида беллашувлар ташкил этилди. Бугун баҳсларга киришган 6 дзюдочимизнинг 3 нафари якунда шоҳсупага кўтарилди.

Қувонарлиси, -90 кг вазн тоифаси финал учрашувига Ўзбекистон терма жамоасининг икки вакили етиб келди. Муросасиз кечган учрашувда 20 ёшли Шаҳзодхўжа Шарипов иппон баҳоси эвазига Нурбек Муртазоевни мағлуб этиб, олтин медални қўлга киритди. Шарипов бир ярим ой олдин Тошкент "Катта Дубулға" турнирида ҳам чемпион бўлган эди.

-78 кг вазнда курашган Маржона Кўчимова эса бронза медалига сазовор бўлди. У учинчи ўрин учун кечган беллашувда Хитой Тайпейи вакиласини партерда ушлаш усулида таслим этди.