Дзюдочиларимиз Тошкент Гран-Присида 20та медал қўлга киритишди

Кетма-кет тўртинчи маротаба Тошкентда ташкил этилган ушбу нуфузли мусобақада 15та мамлакат полвонлари жами 14 (аёллар ва эркаклар 7тадан вазнда)та вазн тоифасида медаллар учун бахсларга киришишди.

Эътиборлиси, якунда Ўзбекистон терма жамоаси 6та олтин, 3та кумуш, 9та бронза, жами 20та медал билан умумжамоа ҳисобида биринчи ўринни эгаллади.

Учта олтин, 2та кумуш, 5та бронза медалини қўлга киритган Қозоғистон терма жамоаси иккинчи ўринни банд этди. Учта олтин, 2та кумуш ва 4та бронза медалига эгалик қилган Россия терма жамоаси кучли учликка якун ясади.

Тошкент Гран-Присида терма жамоамизга олтин медалларни Муҳриддин Тиловов (-60 кг), Мирзоҳид Фармонов (-73 кг), Давлат Бобонов (-81 кг), Яхё Имомов (-90 кг), Сойиб Қурбонов (-100 кг) ҳамда Гулноза Матниёзова (-70 кг) тақдим этишди.

Ғиёсжон Бобоев, Давронбек Сатторов ва Диёра Келдиёрова финалгача етиб бориб, кумуш медал билан тақдирланишди. Шарофиддин Лутфуллаев, Болтабой Болтаев, Эркин Дониёров, Муҳаммадкарим Хуррамов, Мусо Собиров, Нодира Гулова, Муқаддас Кубеева, Гулойим Жумабоева, Санобар Султонова, Кумуш ҳамда Раҳима Йўлдошевалар бронза медалига сазовор бўлишди.