Дзюдочимизларимиз Озарбайжонда 35 давлат орасида биринчи бўлишди

Дунёнинг 35 давлатидан 212 нафар пара дзюдочи иштирок этган нуфузли мусобақада Ўзбекистон терма жамоаси аъзолари ҳам муносиб тарзда юртимиз шарафини ҳимоя қилишди. 

Иккинчи кунги баҳсларда 4 дзюдочимиз татамига чиққан бўлса, улардан 3 нафари совриндорлар сафидан жой олди. Эркаклар ўртасидаги +100 кг вазн тоифасидаги баҳсларда татамига чиққан Ширин Шарипов барча рақибларини мағлуб этиб, олтин медални қўлга киритди. 

Аёллар ўртасида -63 кг вазндаги беллашувларда ўз маҳоратини намойиш этган Нафиса Шерипбоева ҳам шохсупанинг энг юқори поғонасига кўтарилди. -70 кг вазн тоифасидаги вакиламиз Васила Алибоева эса бронза медали билан тақдирланди. -100 кг вазнда иштирок этган Лондон-2012 Паралимпия ўйинлари кумуш медали совриндори Шариф Ҳалилов илк учрашувдаёқ озарбайжонлик Канан Абдуллаханлига ютқазиб қўйди.

Шу тариқа, 4 та олтин, 4 та бронза медалини қўлга киритган Ўзбекистон терма жамоаси 35 давлат орасида умумжамоа ҳисобида биринчи ўринни эгаллади. Мезбонлар Озарбайжон терма жамоаси 3 та олтин, 4 та кумуш, 4 та бронза медали билан иккинчи ўринни банд этишди. Кучли учликка 1 та олтин, 1 та кумуш, 2 та бронза медали билан Украина дзюдочилари якун ясашди.  

Дзюдочиларимизнинг сўнгги кун натижалари:

+100 кг вазн тоифаси

1. Ширин Шарипов (Ўзбекистон)

2. Муҳаммадризо Хейроллаҳзода (Эрон)

3. Реваз Чикоидзе (Грузия)

3. Кенто Масаки (Япония)

-63 кг вазн тоифаси

1. Нафиса Шерипбоева (Ўзбекистон)

2. Ольга Позднишева (Россия)

3. Ханим Хусейнова (Озарбайжон)

3. Ю Е Ванг (Хитой)

-70 кг вазн тоифаси

1. Фабиола Рувалкаба Альварес (Мексика)

2. Алана Мартинс (Бразилия)

3. Васила Алибоева (Ўзбекистон)

3. Ольга Забродская (Россия)