Эктор Купер: "Ўзбекистон терма жамоасига қарши реванш кайфиятида эмасман"

- Омар Ал Сома терма жамоада йўқ. Бу қарор ҳақида гапира оласизми? Агарда Сурия терма жамоаси гуруҳдан чиқа олмаса, бу катта босим бўлади. Бу вазиятга қандай ёндашмоқдасиз?

- Босим ҳар доим бўлган. Футболчилар буни қандай енгишни билишлари керак. Уларнинг бор эътибори ўйинда бўлиши лозим. Негатив энергияларга эътибор бермаймиз. Қайсидир ўйинчи таркибда бўлмаса, биз шу ҳолатда футбол ўйнашга тайёр бўлишимиз керак. Бу жамоада мен мураббийман ва қарорларни мен қабул қиламан.

- Ўзбекистон терма жамоасида ишлагансиз. Ҳозирда бу терма жамоа олдингидан кучлироқми ёки акси?

- Албатта, мен уларни яхши биламан. Аммо уларда жуда кўп нарса ўзгариб кетди - бошқа номлар, янги футболчилар. Ўзбекистонда жуда зўр бош мураббий бор. Уларнинг камчили ҳам бор. Чунки ҳаммада камчилик мавжуд. Эртага биз ушбу муаммоларни юзага чиқара оламиз деб ўйлайман.

- Сурия терма жамоасида янги ўйинчилар жуда кўп. Бу масалага қандай ёндашяпсиз?

- Биз ҳозир жуда яхши ички муҳитдамиз. Биз ҳаммасини яхшилаяпмиз.

- Ўзбекистон терма жамоасига қарши улар ҳақидаги билимларингиздан келиб чиқиб тайёрланасизми ёки уларга оддий рақиб сифатида қарайсизми?

- Мен Жалолиддин ва бошқа ўйинчиларни яхши биламан, аммо замонавий футболда бу нарса унчалик ҳам аҳамият касб этмайди. 2019 йилдан бери улардан кўп нарса ўзгариб кетди. Сиз жамоани яхши билишингиз мумкин, аммо ўйин жараёнида бу нарса ёрдам бермаслиги мумкин.

- Ўзбекистон терма жамоасига қарши қандай таркибда ўйнашингизни ҳал қилиб бўлганмисиз?

- Бошланғич таркиб бўйича менинг режам аллақачон бор. Тўғри, ўйинга яқин ўзгаришлар бўлади. Мен одатда асосий таркибни учрашувдан бир неча соат олдин аниқлайман. Бу нарса Ўзбекистон терма жамоасига боғлиқ бўлмайди. Биздаги 26 нафар ўйинчилар барчаси тайёр. Уларнинг исталган бири майдонга туша олади. Бизда ишонч юқори.

- Жаноб Купер, аввал Ўзбекистон терма жамоасида ишлагансиз. Сизга қайсидир маънода охиргача имконият берилмаган. Шу нуқтаи назардан қаралса, бу ўйинда ғалаба қозонишга ўзгача иштиёқ борми?

- Йўқ, шахсан ўзимда ҳеч қандай реванш кайфияти йўқ. Ўзбекистон футбол ассоциацияси менга жуда яхши муомалада бўлган, улар билан алоқаларимиз яхши. Мен улардан доим миннатдорман. Раҳбарият, футболчилар ва ҳатто мухлислар ҳам менга илиқ муносабатда бўлишган. Шундай экан, ҳеч қандай хафагарчилик ёки реванш кайфияти ҳақида гап бўлиши мумкин эмас. Албатта, мен бу ўйинда ғалаба қозонишни мақсад қилганман. Ўзбекистоннинг бунга алоқаси йўқ. Сурия терма жамоаси мураббийи сифатида бу ўйинда ғалаба қозонишга ҳаракат қиламан. Биз ҳаммамиз профессионаллармиз.

- Жаноб Эктор сизда жуда катта тажриба бор. Шу нуқтаи назардан олиб қаралса, футболчиларни қандай руҳлантирасиз. Чунки мотивация бундай турнирларда жуда катта аҳамиятга эга...

- Ҳамма ҳозирда яхши натижа кўрсатишимизга ишоняпти. Биз инсонларга қувонч улашамиз. Мен футболчиларга айнан шуни эслатаман. Йигитларга уларни оилалари, дўстлари томоша қилаётганини таъкидлайман. Футболчиларга қарата босимга, қувончга, ҳис туйғуларга ҳуш келибсиз деймиз.