Елена Исинбаева: “Осиё ўйинлари мезбонлиги учун курашда Ўзбекистонга омад тилайман”

Тадбир давомида жаҳон спорти афсонаси ўзининг таассуротлари ва дил изҳорлари билан ўртоқлашди.

“Қўрқмасдан айта оламанки, мамлакатингиз раҳбарияти спортни ривожлантириш учун истиқболли ғоялар билан ишламоқда. Юртингизда уч ҳафтадан сўнг халқаро марафон бўлиб ўтади. Бу жуда катта воқелик. Унда кўплаб давлатлардан иштирокчилар ва мутасаддилар ташриф буюриб, мусобақа борасида ўз фикрларини билдиришади.  Ўйлайманки, бу Ўзбекистонда спорт ва енгил атлетиканинг ривожи учун яхши импульс бўлади. Энг асосийси, 2030 йили бўлиб ўтадиган Осиё ўйинларига мезбонлик қилиш учун курашда сизларга омад тилаб қоламан. Аминманки, шундай ривожланишда ниятингизга ета оласиз», – дейди Исинбаева.

Елена Исинбаева ташрифи давомида 2002-2003 йилларда туғилган ўсмирлар ўртасидаги Марказий Осиё халқаро мусобақасида ғолиб ва совриндор бўлган ёш атлетларни тақдирлаш маросимида ҳам иштирок этди.

Қолаверса, Ўзбекистон Давлат жисмоний тарбия ва спорт университети мутасаддилари билан енгил атлетиканинг ривожи борасида ўтказилган суҳбатда ҳам иштирок этиб, ўзининг қимматли маслаҳатларини аямади. Йиғилиш якунида фахрий меҳмонга қимматбаҳо совғалар топширилди.