Энг кучли триатлончилар жам бўладиган Осиё кубогига бағишланган матбуот анжумани ўтказилди

Пойтахтимиздаги “Hilton” меҳмонхонасида мусобақага бағишланган матбуот анжумани ўтказилиб, унда мутасаддилар турнир атрофидаги қизиқарли саволларга жавоб беришди. 

Маросимда Спортни ривожлантириш вазирининг ўринбосари Шаҳрулло Маҳмудов, МОҚ Бош котиби Ойбек Касимов, Ўзбекистон триатлон федерацияси Бош котиби Елена Кун спикер сифатида қатнашдилар.

Қайд этиш жоиз, бир-биридан нуфузли халқаро мусобақаларни қабул қилаётган Самарқанд сўнгги пайтда эътибор марказидаги шаҳарлардан бирига айланиб улгурди. Триатлон бўйича ўтадиган Осиё кубоги ҳам мазкур кўҳна шаҳарнинг туристик салоҳиятини очиб беришга яна бир омил бўлади. 

Анжуманда сўз олган мутасадди раҳбарлар бу ҳақида алоҳида тўхталиб, Президентимиз томонидан юртимизда оммавий спорт тарғиботини кучайтиришга қаратилаётган эътибор хусусида ҳам гапириб ўтишди.

Ўзбекистон триатлон федерациясининг маълум қилишича, 8 октябрь куни 30 мамлакатдан ташриф буюрган 70 нафар профессионал спортчи чемпионлик учун беллашади. 9 октябрь санасида эса 160 нафар ҳаваскор атлетлар ўртасида шоҳсупа эгалари аниқланади. 

Аҳамиятлиси, ёшларга юксак намуна кўрсатиш учун Ўзбекистон Республикаси Мудофаа вазири ҳам улар орасида иштирок этиши кутилмоқда. Ҳар икки кунги беллашувлар триатлоннинг классик йўналиши: очиқ ҳавзада 1,5 кмга сузиш, 30 кмга велопойга ва 10 кмга югуриш дастурларида ўтказилади.

Анжуман давомида ОАВ ходимлари мусобақа бўйича ўзларини қизиқтирган бошқа саволларга ҳам жавоб олишди.