Енгил атлетика бўйича миллий чемпионатларни ўтказиш муддати белгиланди

Бу масалада ташкилот ассоциацияга аъзо миллий федерациялар ва минтақа ассоциациялари билан фаол ҳамкорлик қилмоқда.

Халқаро енгил атлетика федерациялари ассоциацияси Бриллиант лига (Diamond League) мусобақаси ташкилотчилари билан муҳокамалари натижасида 2020 йилнинг 8-9 август саналари енгил атлетика бўйича ҳозир бекор қилинган миллий чемпионатларни ўтказиш учун энг мақбул сана деб топилди.

Маълумки, аввалги Олтин лига ўрнини эгаллаган Бриллиант лигаси енгил атлетика бўйича тижорат мусобақалари туркумини ташкил этади. 2020 йил 8-9 августда Халқаро енгил атлетика федерациялари ассоциацияси ва Бриллиант лигаси ана шу санада ўз мусобақаларини ўтказишни мўлжалламаган. Миллий чемпионатларни юқорида кўрсатилган санада ўтказиш бу мусобақаларда ҳар бир мамлакат энг кучли спортчиларининг иштирок этишига имконият яратади.

Халқаро ташкилот жаҳонда хавфсиз вазият пайдо бўлиши биланоқ, имконият туғилган пайтда 2020 йил ёзги мавсум мусобақаларини бошлашга тайёргарлик кўрмоқда. Спортчилар 2020 йилнинг октябрь ойига қадар иложи борича кўпроқ мусобақаларда иштирок этиш ниятидалар. Яна бир аҳамиятли жиҳати атлетлар комиссияси ва Жаҳон енгил атлетика кенгашининг қарорига кўра, 2020 йил 6 апрелдан 30 ноябргача бўлган даврда енгил атлетика бўйича ҳар қандай мусобақада эришилган натижалар “Токио-2020” нормативлари ёки жаҳон рейтинги учун ҳисобга олинмайди.

Шу билан бирга Халқаро енгил атлетика федерациялари ассоциацияси яқин орада Бриллиант лигаси ва Қитъа турининг 2020 йил ёзги мавсуми мусобақаларини ўтказиш муддатлари ўзгартирилишини эълон қилади.