Энтони Жошуанинг Жермейн Франклинга қарши жанги якунланди

Буюк Британия пойтахти бўлмиш Лондонда жойлашган 02 Arena'да навбатдаги нуфузли бокс кечаси ўз якунига етди.

Matchroom Boxing промоутерлик компанияси томонидан ташкил этилган кечанинг марказий жангида супероғир вазнда собиқ жаҳон чемпиони Энтони Жошуа америкалик 29 ёшли чарм-қўлқоп устаси — Жермейн Франклинга қарши рингга кўтарилди. 12 раунд этиб белгиланган супер жанг тўлиқ давом этди ва унда кутилганидек Энтони Жошуа муваффақият қозонди. Инглиз боксчиси Жермейн Франклиндан ҳакамларнинг якдил қарорига кўра (118:111, 117:111, 117:111) устун келди.

Мазкур ғалаба Жошуа учун фаолиятидаги йигирма бешинчиси бўлди, Франклин эса карьерасидаги иккинчи мағлубиятини қабул қилиб олди.

Шунингдек, кечанинг co main event тўқнашувида яна бир англиялик боксчи — Фабио Уордли оғир вазнда WBA Continental камари учун америкалик Майкл Полит-Коффига қарши рингга чиқиб, ғалаба қозонди. Боксчилар ўртасидаги 10 раундга мўлжалланган жанг тўртинчи раундда Уордлининг нокаути билан якунланди.