Эркин курашчиларимиз Киев турнирига йўл олишди

Олимжон Ҳикматов, Абдурауф Бозорбоев, Латиф Халимов, Арсен Аҳмедов мураббийлигидаги курашчиларимиз Анқарада икки ҳафта давомида кунига икки маҳалдан машғулот ўтказишди. Ушбу йиғин Украинанинг Киев шаҳрида ўтказиладиган халқаро турнирга тайёргарлик вазифасини ўтаб берди. 

Кеча кечқурун терма жамоамиз делегацияси Ислом Каримов номидаги Тошкент халқаро аэропортидан Киев шаҳрига жўнаб кетди. Эркин курашчиларимиз эртага Украина пойтахтида старт оладиган халқаро хотира турнирида юртимиз шарафини ҳимоя қилишади. Бугун ўз тарихида йигирма тўртинчи маротаба ташкил этилаётган ва йигирмадан зиёд давлат курашчилари қатнашадиган халқаро хотира турнирига қуръа ташлаш маросими ўтказилади. 

Эътиборга молик жиҳати шундаки, -57 кг вазн тоифасида тўрт нафар курашчимиз гиламга чиқади. Бу ҳақида аввал ҳам бир неча бор таъкидлаганмиз, айнан -57 кг вазн тоифасида ички рақобат жуда ҳам кучли. Тўрт нафар курашчимиз ҳам Олимпиада саралаш мусобақасига ҳақли. Киев гиламлари айни пайтда ким кучлироқ эканини кўрсатади.  

Терма жамоамиз таркиби:

-57 кг: Маҳмуд Шавкатов, Ғуломжон Абдуллаев, Нодиржон Сафаров, Умиджон Жалолов

-65 кг: Ильяс Бекбулатов

-74 кг: Ихтиёр Наврўзов, Мирзо Ҳайитов

-79 кг: Бекзод Абдураҳмонов

-86 кг: Жавраил Шапиев

-97 кг: Магомед Ибрагимов

125 кг: Мақсуд Вейсалов