Эронлик мутахассис каратэчиларимизни Олимпиадага тайёрлайди

Мусобақа доирасида Ўзбекистон каратэ Миллий федерациясининг махсус матбуот анжумани ташкил этилди. Унда эронлик мутахассис Шаҳаб Султони кенг оммага Ўзбекистон катталар терма жамоасининг янги бош мураббийи сифатида расман таништирилди. 

Маросимда Ўзбекистон Жисмоний тарбия ва спорт вазирининг биринчи ўринбосари Ойбек Касимов, Миллий олимпия қўмитаси вице-президенти Сакен Полатов, Ўзбекистон каратэ Миллий федерацияси раиси Алламжон Муллаев, Эрон Ислом Ресбпубликасининг юртимиздаги элчихонаси вакиллари ҳамда оммавий ахборот воситалари ходимлари иштирок этишди. 

Шаҳаб Султони матбуот анжуманида саволларга жавоб берар экан, ўзбекистонлик каратэчиларнинг Токио-2020 Олимпия ўйинларига имкон қадар кўпроқ йўлланма олиши учун ўз хиссасини қўшишга астойдил ҳаракат қилишини таъкидлади. 

Тадбир якунида Ойбек Касимов бош мураббийга янги бошлаётган ишида муваффақият тилади ва унга терма жамоа либосини топширди. 

Суратлар муаллифи - Алимурод Мамадаминов