Эртага Самарқандда Осиё чемпионати бошланади

Мамлакатимизда илк бор ташкил этилаётган мазкур қитъа чемпионатида Ўзбекистон, Қозоғистон, Бангладеш, Хитой Тайпейи, Гонконг, Ироқ, Япония, Иордания, Ҳиндистон, Уммон, Тожикистон, Қувайт, Фаластин, Эрон каби 14 та давлатдан жами 45 нафар спортчи совринли ўринлар учун кураш олиб боради.

Улар орасида Жаҳон ва Осиё чемпионатлари совриндорларининг ҳам борлиги мусобақаларни нечоғлик муросасиз ўтишидан далолат беради. Мазкур Осиё чемпионатида Ўзбекистон шарафини жами 7 нафар (4 нафар эркак, 3 нафар аёл) спортчи ҳимоя қилади.

Мусобақа арафасида ҳакамлар учун семинар ташкил этилди. Осиё сузиш федерациясининг техник қўмитаси аъзоси Сох Сианг бошчилигида ўтказилган семинарда очиқ сув ҳавзасида ўтадиган мусобақа қонун-қоидалари, техник талаблар ҳамда хавфсизлик чоралари ҳақида атрофлича маълумот берилди.

Маълумот учун, Очиқ сув ҳавзасида сузиш бўйича Х Осиё чемпионатида иштирокчилар 5 ва 10 километр масофага сузиш бўйича мусобақаларда совринли ўринлар учун кураш олиб боришади.