Эшитдик-да! Ўзбекистон терма жамоаси март ойида Япония эмас Ироқ билан ўйнайди

Бироқ пандемик вазият туфайли Осиё қитъасида март ойида ўтиши керак бўлган ЖЧ-2022 саралаш баҳсларининг деярли барчаси июнь ойига қолдирилди.

Ўзбекистон терма жамоаси март ойида расмий ўйинда майдонга тушмаслиги аниқ. Шу боис терма жамоамиз ФИФА кунлари доирасида ўртоқлик учрашуви ўтказишга қарор қилди.

Championat.asia сайти маълумотига кўра, Япония футбол ассоциацияси Ўзбекистон терма жамоаси билан ўртоқлик учрашуви ўтказиш борасида таклиф билан чиққан. Унга кўра баҳс Японияда ўтиши керак эди ва бунинг эвазига мезбонлар барча харажатларни ўз ҳисобларидан амалга оширишга тайёр эдилар. Бироқ бу таклиф рад қилинган ва Тошкентда Ироқ билан ўйин ўтказишга қарор қилинган.

Маълумот учун, Ўзбекистон терма жамоаси 2019 ва 2020 йилларда Ироқ билан ўртоқлик учрашувларида майдонга тушган. Япония билан сўнгги ўртоқлик ўйинимиз эса 2015 йилда бўлиб ўтган.