"Эспаньол" собиқ футболчисига 9 йиллик қамоқ жазоси берилиши мумкин

29 ёшли футболчи каталонияликлар клуби ходимасини зўрлаганликда айбланмоқда.

Воқеа тафсилотларига кўра, жабрланувчи 2024 йил июнь ойида, жамоанинг Ла Лигага қайтганини нишонлаш мақсадида Барселонадаги "Опиум" тунги клубида ўтказилган зиёфат пайтида футболчи уни ҳожатхонада зўрлаганини даъво қилган. Ходима ишдан ҳайдалишидан қўрқиб ва руҳий босим сабабли фақат 2025 йилнинг январига келибгина полицияга мурожаат қилган.

Гарчи Агуадо жинсий алоқа икки томонлама розилик асосида бўлганини таъкидлаётган бўлса-да, суд 2025 йил октябрь ойида унинг айбдорлигига доир далилларни топган эди. "COPE" нашрининг хабарига кўра, айблов томони футболчи учун қуйидаги жазоларни сўрамоқда:

9 йиллик қамоқ жазоси;

Озодликка чиққанидан сўнг 10 йил давомида қаттиқ назорат остида бўлиш;

Жабрланувчига яқинлашиш ва у билан алоқа қилишни 8 йилга тақиқлаш;

Жами 65 000 евро миқдорида жарима (маънавий ва руҳий зарар учун компенсация).

Маълумот учун, Альваро Агуадо 2025 йил ёзидан бери эркин агент мақомида бўлиб турибди.