European Chess Club Cup. Абдусатторовни мағлуб этишди, яна бир Нодирбекда дуранг, Синдаровда ғалаба

Эркаклар ўртасидаги European Chess Club Cup мусобақаси ўз тарихида 39, аёллар иштирокидагиси эса 28-маротаба ташкил этиляпти. Бу йилги қитъа кубогида уч нафар гроссмейстеримизнинг ҳам Европа клублари таркибида муваффақиятли тарзда қатнашаётгани ҳақида хабар берган эдик.

Нодирбек Абдусатторов ва Жавоҳир Синдаров Руминиянинг "SuperChess", Нодирбек Якуббоев эса Словениянинг "TAJFUN-ŠK Ljubljana" жамоалари шарафини ҳимоя қиляпти. Кеча 6-турда шахматчиларимизнинг жамоалари навбатдаги ғалабага эришишди. "SuperChess" клуби "Tuxera Aquaprofit Nagykanizsai Sakk Klub" жамосини 4,5:1,5 ҳисобида енгди. Нодирбек Абдусатторов оқ доналарда ўйнашига қарамай, украиналик Андрей Волокитинга имкониятни бой бериб қўйди. Жавоҳир Синдаров эса аксинча, венгриялик Акцел Гергелини таслим этди. 

Якуббоевнинг "TAJFUN-ŠK Ljubljana" клуби 6-турда "Beer Sheva Chess Club" жамоасидан 3,5:2,5 ҳисобида устун келди. Якуббоев қора доналарда исроиллик Нитзан Стейнберг билан дуранг ўйнади. Пешқадамлар "Novy Bor Chess Club" - "Alkaloid" ҳамда "Turkish Airlines" - "C'Chartres Echecs" учрашувларида 3:3 ҳисобидаги жанговар дуранг қайд этилди.  

Олтинчи турдан сўнг 5 ғалаба ва 1 дурангга эга Чехиянинг "Novy Bor Chess Club" клуби 11 очко билан якка пешқадамлигини давом эттирмоқда. Нодирбек Абдусатторов ўйнаётган "SuperChess" клуби 10 очко билан қўшимча кўрсаткичларга кўра 2-ўринга кўтарилиб олди. "Turkish Airlines", "Alkaloid", "TAJFUN-ŠK Ljubljana", "Bayegan Pendik Chess Sports Club" ва "C'Chartres Echecs" жамоалари ҳисобида ҳам 10 тадан очко бор. 

Бугун 7-турда чемпион номини аниқлаб бериши мумкин бўлган учрашувда "SuperChess" клуби пешқадам "Novy Bor Chess Club" жамоаси билан ҳисоб-китоб қилади. Нодирбек ва Жавоҳирдан бугунги учрашувларда ғалаба кутамиз. Якуббоевнинг "TAJFUN-ŠK Ljubljana" клуби эса 7-турда "Sentimento Ajka BSK" жамоасига қарши дона суради.